ماڵپه‌ڕی یه‌کشه‌وه‌

یارمه‌تییه‌کانتان


به‌ڵگه‌ نامه‌

پەیامی کومیتەی ناوەندیی ڕێکخراوی خەبات،ی شۆڕشگێڕی کوردستان بە بۆنەی ساڵی نوێی ١٣٩٦ەوە
پەیامی کومیتەی ناوەندیی ڕێکخراوی خەبات،ی شۆڕشگێڕی کوردستان بە بۆنەی ساڵی نوێی
ڕاگەیەندراوی ڕێکخراوی خەبات،ی شۆڕشگێڕی کوردستان لە پێوەندیی لەگەڵ مردنی عەلی ئەکبەر ڕەفسەنجانییدا
ڕاگەیەندراوی ڕێکخراوی خەبات،ی شۆڕشگێڕی کوردستان لە پێوەندیی لەگەڵ مردنی عەلی ئەکبەر
ڕاگەیەندراوی ڕێکخراوی خەبات،ی شۆڕشگێڕی کوردستان سەبارەت بە تەقینەوە لە بارەگای سەرکردایەتیی حیزبی دێموکڕاتی کوردستان
ڕاگەیەندراوی ڕێکخراوی خەبات،ی شۆڕشگێڕی کوردستان سەبارەت بە تەقینەوە لە بارەگای
ڕاگەیەندراوی ڕێکخراوی خەبات،ی شۆڕشگێڕی کوردستان سەبارەت بە دەستگیرکرانی (سەلاحەددین دەمیرتاش) و چەند پەرلەمانتارێكی دیکە
ڕاگەیەندراوی ڕێکخراوی خەبات،ی شۆڕشگێڕی کوردستان سەبارەت بە دەستگیرکرانی (سەلاحەددین

پەیامی کومیتەی ناوەندیی ڕێکخراوی خەبات،ی شۆڕشگێڕی کوردستان بە بۆنەی ساڵی نوێی ١٣٩٦ەوە

بەناوی خودای بەخشندەی مێهرەبان

لەمێژ ساڵە بەهار و نوێبوونەوەی ساڵ لەنێو کوردەواریی مانا و نێوەرۆکی تایبەتیی وەرگرتووە. لەلایەک تەواوبوونی ساڵێک و سەرەتای دەورێکی دیکەی سووڕی ژیان و ساڵێکی تازەیە، لە لایەکی دیشەوە دەستپێکی وەرزی وەژین و هەڵدانەوە و هەستانەوەی سروشتە. لەم چەند ساڵانەی دواییشدا، بە تایبەتیی لە ڕۆژهەڵاتی وڵات، نەورۆز بۆتە هۆی یەکڕیزیی و یەکهەڵوێستیی خەڵک بە گشتیی و هەوێنی هەستان و وەستان لە بەرابەر ڕژیمدا.

ئێستا جێژنی نوێبوونەوەی ساڵ و کۆبوونەوە نەورۆزییەکانی خەڵکی کوردستان کەلێن و دەرفەتێكن بۆ دەربڕینی هەستی نەتەوەیی و بۆنەیەک بۆ نیشاندانی ڕق و تووڕەیی لە هێزی داگیرکەر و بەگژداچوونەوەی دەسەڵاتی دوژمن. ئەوە چەند ساڵێکە ئێمە و دۆست و دوژمن دەبینین کە چۆن خەڵک بە گشتیی و کچان و کوڕانی بە هەست و هەڵوێستی کورد لەو دەرفەتە کەڵك وەردەگرن و، بە کۆڕ و کۆبوونەوە و چالاکیی جۆراوجۆریی جەماوەریی بەرەوپیری ساڵی نوێ و بەهار دەچن و، ڕەنگ و تام و بۆنێکی سیاسیی و شۆڕشگێڕانەیان پێدەدەن و ترس و لەرز دەخەنە دڵ و پەیکەری داگیرکەر و تەما بە سەرکەوتن و هیوا بە سەربەخۆیی لە گیانی گەلدا زیندوو دەکەنەوە.

بە داخەوە ئەمساڵیش وەک جارانی پێشوو لە کاتێکدا بە پێشوازیی ساڵی نوێوە دەچین کە تەمی تاریکی کۆماری تاریکپەرستانی تاران هەروا خۆی بەسەر وڵات و بەهارەکەماندا کێشاوە. زوڵم و زۆر و زەبروزەنگ و زەجر و زیندان، ستەمی چەند لایەن بە تایبەتییش ستەمی مەزەبیی و نەتەوایەتیی، ڕاونان و گرتن و کوشتن و ئەتک و ئیعدام، برسیەتیی و گرانیی و قاتوقڕیی، تەشەناکردنی دەردە دەروونیی و پەتا جەستەییە هەمە جۆرەکان، فەسادی فرەلایەنی ئەخلاقیی و کۆمەڵایەتیی و سیاسیی ژیان و ژینگەی ئێران و کوردستان و دەستە و دەزگا گەورە و گچکەکانی ڕژیمی بە ناو ئیسلامیی تەنیوەتەوە. بەڵام لە لایەکی دیکەوە جێی هیوا و خۆشحاڵییە کە هەموو ئەو دەرد و بەڵایانە و هێزی زۆر و زەوەندی سەرکوتی ڕژیمیش نەیانتوانیوە دیواری باوەڕ و متمانەی ڕۆڵە خەباتگێرەکانی کورد بلەرزێنێ و هێز و وزەی بەربەرەکانیان تێدا بمرێنێ و بڕوای سەرکەوتن بە ئازادیی و سەربەخۆییان لێ بستێنێ. هەر ئەو چالاکییە ئاشکرا و بەربڵاوانەی کوڕان و کچانی ئازا و ئازادی کورد ساڵانە شار و گوندەکانی کوردستانی پێ دەڕازێننەوە گەورەترین شاهید و ڕوونترین بەڵگەی ئەو ڕاستییەن کە خەڵکی کوردستان و لاوە دڵگەرم و دڵسۆزەکانی هەر زیندوون و هەر زیندووش دەمێننەوە و، وەکو بەهار و گوڵاڵەسووورەکانی پاش هەموو شەختە و سەختییەک سەردەردێننەوە و سەر بە سەرما نەوی دەکەن.

بەهار لای ئێمەی کورد ڕەمزیی مان و ژیانەوەیە، هەوێنی هەستانەوەیە، هەڕەتی هەڵدانەوەیە، بۆنەی بەرەنگاربوونەوە و ساتی سەرماچوونەوەیە. بەهار فێری نەبەزین و نەتەزینمان دەکا و پێمان دەڵێ کە هەڵدانەوە و هەستانەوە و سەرکەوتن لە یەکڕیزی و یەکبووندایە.

بە بۆنەی ساڵی نوێی ١٣٩٦ی هەتاویی و هاتنی بەهار پیرۆزبایی گەرم پێشکەش بە خەڵکی خۆڕاگری کوردستان، بە تایبەتییش بنەماڵەی سەربەرزی شەهیدان و زیندانیانی سیاسیی و خەباتگێڕانی کورد بە گشتیی و، هەروەها بە ئەندامان و تێکۆشەرانی ڕێکخراوەکەمان، ڕێکخراوی خەبات،ی شۆڕشگێڕی کوردستان، دەڵێین. لە خودای خاوەنی هێز و دەسەڵات داوا دەکەین ڕێگەی گەیشتن بە ئاواتە پیرۆز و گەورەکەمان، کە ڕزگاریی گەل و ئازادیی وڵاتە، تەخت و ئاسان بکا و ئازادیی بکاتە دیاری ئەم ساڵ و بەهارە نوێیە.

 

ڕێکخراوی خەبات،ی شۆڕشگێڕی کوردستان

کومیتەی ناوەندیی

٢٨ی ڕەشەمەی ١٣٩٥ی کۆچیی- هەتاویی

١٩/٣/٢٠١٧ی زاینیی